((( ရွှေအကြောင်းစကားစမြည် )))
" အရှင်ဘုရား---ဗုဒ္ဓဘာသာက အမှန်ဆုံး၊ သိပ္ပံပညာနဲ့အကိုက်ညီဆုံးလည်းဆိုသေး၊ ဘာလို့ ကမ္ဘာပေါ်မှာ လူကိုးကွယ်မှုအနည်းဆုံးဘာသာ ဖြစ်နေရတာလဲဆိုတာကို ပါဠိကျမ်းဂန်တွေလည်း မကိုးဘဲ၊ အခြားဘာသာကိုလည်း မထိခိုက်စေဘဲ အရှင်ဘုရားရဲ့ အမြင်သက်သက်နဲ့ ဖြေကြည့်ပါလား "
" အခြားဆရာတော်ကြီးတွေဖြေထားတာတွေ ရှိပါတယ်ကွာ၊ ငါဖြေနေရင် ပိုနေဦးမယ်၊ အဲ့ဒီရှိပြီးသား အဖြေတွေကိုသာ လိုက်ရှာကြည့်လိုက်ပါတော့ "
" အာ---အရှင်ဘုရားကလည်း တပည့်တော်မရှာချင်လို့ အရှင်ဘုရားကို မေးတာပေါ့ဘုရာ့၊ အရှင်ဘုရားဖတ်ဖူး မှတ်ဖူးထားတာရှိရင် တပည့်တော်ကို ပြန်မျှဝေပါဦး"
" အေး---အဲ့ဒါဆိုလည်း ဖြေရတာပေါ့ကွာ၊ ဗုဒ္ဓဘာသာဟာ မှန်ကန်ပါလျက် သိပ္ပံပညာနဲ့ လည်း ကိုက်ညီပါလျက် ဘာကြောင့် လူကိုးကွယ်မှုအနည်းဆုံးဖြစ်နေရတာလဲ
ဆိုတာရဲ့ ပထမဆုံးအကြောင်းကတော့ အခု မင်းလိုလူတွေများနေလို့ပဲ "
" ဟာ---အရှင်ဘုရားကလည်း ဘာဆိုင်လို့လဲ "
" ဟုတ်တယ်လေ---အဲ့ဒီအကြောင်းကို ကိုယ်တိုင်ရှာဖွေ လေ့လာကြည့်ဖို့ ငါက တိုက်တွန်းတယ်၊ ဒါပေမယ့် မင်းကတော့ ပျင်းတယ်၊ အလွယ်လိုချင်ရချင်တယ်၊ ငါ့ကို အားကိုးတယ်၊ တစ်နည်းအားဖြင့် သူများကို အားကိုးတယ်"
" အာ---အရှင်ဘုရားကလည်း ဒါကတော့ "
" ဒါက မတော့နဲ့---ငါတို့ဗုဒ္ဓဘာသာဆိုတာ ကိုယ်တိုင်ကျင့်ကြံဖို့တိုက်တွန်းထားတဲ့ဘာသာ၊ ကိုယ့်အားကိုယ်ကိုးတာကို အားပေးတဲ့ဘာသာ၊ ဒါ့ကြောင့် မင်းလို သူများအားကိုးချင်တဲ့သူ၊ အလွယ်လမ်းလိုက်ချင်တဲ့လူတွေနဲ့ ဗုဒ္ဓဘာသာဟာ သိပ်အံဝင်ခွင်ကျမဖြစ်ဘူး "
" အဲ့ဒါကြောင့် ဗုဒ္ဓဘာသာက လူကိုးကွယ်မှုအနည်းဆုံးဖြစ်နေတယ်ပေါ့၊ ဒီလိုလား "
" ကမ္ဘာပေါ်မှာ အနည်းဆုံးဆိုတဲ့အရာတွေဟာ အမှန်ကန်ဆုံးဖြစ်ချင်မှ ဖြစ်မယ်၊ ဒါပေမယ့် တန်ဖိုးအကြီးဆုံး၊ အခက်ခဲဆုံးဆိုတဲ့ အရာတွေကိုတော့ လူနည်းနည်းလေးကပဲ လုပ်နိုင်ကြတယ် "
" တပည့်တော် နားမလည်ဘူးဘုရာ့ "
" အဲ့ဒါဆို ငါမေးမယ်၊ မင်းတို့ရွာမှာ ဘွဲ့ရတဲ့သူနဲ့ ဘွဲ့မရတဲ့သူ ဘယ်သူပိုများလဲ "
" ဒါကတော့ ဘွဲ့မရတဲ့သူပိုများတာပေါ့ဘုရာ့ "
" ဒါဆို ထပ်မေးဦးမယ်---ဘွဲ့ရတဲ့သူနဲ့ ပညာတတ်တဲ့သူဆိုရင်ရော ဘယ်သူပိုများမလဲ "
" ဟမ်---အရှင်ဘုရားကလည်း အတူတူပဲကို "
" မတူဘူးကွ၊ အချို့က ဘွဲ့ရပေမယ့် သင်ခဲ့ရတဲ့ပညာကို လက်တွေ့အသုံးမချနိုင်ဘူး၊ အဲ့ဒီလိုလူတွေက ဘွဲ့ပဲရတာ တကယ့်ပညာကို မရခဲ့ဘူး၊ အချို့ကတော့ ဘွဲ့လည်းရတယ်၊ သင်ခဲ့ရတဲ့ပညာကိုလည်း လက်တွေ့အသုံးချ နိုင်တယ်၊ အဲ့ဒီလိုလူမျိုးတွေကိုမှ ဘွဲ့ရပညာတတ် ခေါ်တယ် "
" အဲ့ဒီလိုဆိုရင်တော့ အရှင်ဘုရားရယ် ပညာတတ်က ပိုနည်းမှာပေါ့၊ အဲ့ဒါနဲ့ ဗုဒ္ဓဘာသာဦးရေနည်းရတဲ့အကြောင်းနဲ့ ဘယ်လိုပတ်သက်သလဲဘုရာ့ "
" နေဦး---ငါ့မေးခွန်းကမကုန်သေးဘူး၊ ဘွဲ့ရချင်ရင် ဘာလုပ်ရလဲ"
" တက္ကသိုလ်တစ်ခုခုတော့ ပြီးအောင်တက်ရတာ ပေါ့ဘုရာ့
" ပညာတတ်ချင်ရင်ရော "
" အင်း---အဲ့ဒါကတော့ ကိုယ်တိုင်အားထုတ်မှ ရမယ်ဘုရာ့ "
" အေး---ဟုတ်တယ်၊ ဘွဲ့ရဖို့ဆိုတာ ကျောင်းတက်နိုင်ရင် ရတယ်။ ဒါတောင် လူတိုင်းမရဘူးနော်၊ ထိုက်တန်တဲ့ အားထုတ်မှုရှိမှ ရတယ်၊ ဒါပေမယ့် ပညာတတ်ဖို့ဆိုတာကတော့ ကိုယ်တိုင် အားထုတ်မှရတယ် "
" ဗုဒ္ဓဘာသာဆိုတာလည်း အဲ့ဒီလိုပါပဲ၊ သာမန်ဗုဒ္ဓဘာသာဝင်တွေဟာ ဘွဲ့ရပြီး ပညာကို လက်တွေ့အသုံးမချနိုင်တဲ့သူတွေနဲ့တူတယ်၊ ကိုယ်တိုင်လေ့လာပြီး စစ်စစ်မှန်မှန်ကျင့်ကြံနေတဲ့ ဗုဒ္ဓဘာသာဝင်တွေကတော့ ဘွဲ့လည်းရ၊ ပညာကိုလည်း လက်တွေ့အသုံးချနိုင်တဲ့ သူတွေနဲ့ တူတယ် "
" တင်ပါ့---နားလည်သလိုလိုတော့ရှိလာပြီဘုရာ့၊ ဟို---ရွှေနဲ့အမှိုက်ဥပမာလည်း တပည့်တော် ကြားဖူးတယ်ဘုရာ့ "
" အင်း---ပြောပါဦး၊ ဘယ်လိုလဲ "
" ဟိုလေ---တန်ဖိုးကြီးတဲ့ရွှေကရှားပြီး တန်ဖိုးနည်းတဲ့ အမှိုက်ကများသလိုပဲ---တဲ့၊ ဗုဒ္ဓဘာသာဟာ အရေအတွက်နည်းပေမယ့် တန်ဖိုးကြီးတယ်ဆိုတဲ့ ဥပမာ "
" အင်း ဟုတ်ပါတယ်၊ ဒါပေမယ့် "နည်းပေမယ့် ရွှေလိုတန်ဖိုးကြီးတယ်"ဆိုပြီး ဂုဏ်ယူနေရုံနဲ့ မပြီးသေးဘူးကွ"
"" ဘယ်လိုလုပ်ရဦးမှာလဲဘုရာ့ "
" မင်းကို ငါမေးမယ် "
" တင်ပါ့ မေးပါဘုရာ့၊ တပည့်တော်က တစ်ခွန်းပဲ စ,မေးလိုက်ရတယ်၊ အရှင်ဘုရားကချည်း မေးနေတော့တာပဲ "
" သြော် ဒါကတော့ မင်းက သိချင်တာကိုးကွ၊ ကဲ မင်းအနေနဲ့ ရွှေကို အမှိုက်ထဲမှာထားမလား၊ ဒါမှမဟုတ် သေသေချာချာသိမ်းထားပြီး အလှကြည့်နေမလား၊ ဒါမှမဟုတ် ပိုတိုးပွားအောင်လုပ်ပြီး အကျိုးရှိအောင် အသုံးချမလား "
" အာ---ဒါကတော့ အမှိုက်ထဲသွားထားလို့တော့ ဘယ်ဖြစ်မလဲဘုရာ့၊ အင်း---ပြီးတော့ သေချာသိမ်းထားပြီး အလှကြည့်နေပြန်ရင်လည်း ဘာမှအဓိပ္ပာယ်မှ မရှိပြန်ဘူးဘုရာ့"
" ဒီတော့ ဘာလုပ်မလဲ "
" တင်ပါ့---ကိုယ့်ရွှေလေးကို တန်ဖိုးလည်းထား၊ တိုးပွားအောင်လည်းလုပ်ပြီး၊အကျိုးရှိအောင်တော့ အသုံးချရမှာပေါ့၊ ဒါမှ ရွှေတန်ဖိုးတက်မှာလေ "
" အေး---ဟုတ်တယ်၊ အဲ့ဒီလိုပဲ "ရွှေလိုရှားပြီး တန်ဖိုးကြီးတဲ့ ဗုဒ္ဓဘာသာကွ"ဆိုပြီး ဂုဏ်ယူနေရုံနဲ့ မပြီးသေးဘူး၊ အမှိုက်ထဲသွား မထားမိဖို့လည်း လိုတယ်၊ သိမ်းထားပြီး အလှကြည့်မနေမိဖို့လည်း လိုတယ်၊ နောက်ပြီး အမြတ်တနိုးတန်ဖိုးထားဖို့လည်းလိုတယ်၊ တိုးပွားအောင်လုပ်ဖို့လည်း လိုတယ်"'
" ကိုယ့်ရွှေလေး ကိုယ့်ဘာသာ တိုးပွားအောင်လုပ်နေတာကို သူများကဝင်ခိုးသွား လုသွားရင်ရော ဘုရား "
" အေးပေါ့---ကိုယ့်ရွှေကို တိုးပွားအောင်လုပ်တာ သူများစီးပွားလည်း မထိခိုက်ဘူး၊ တရားတဲ့နည်း မှန်ကန်တဲ့နည်းလည်းဖြစ်နေရဲ့သားနဲ့ လာပြီး ဖျက်ဆီးတယ် လုယက်တယ်ဆိုရင်ကတော့ ဥပဒေအတိုင်းလုပ်ရတော့မှာပေါ့လေ "
" တင်ပါ့ "
" ဒါပေမယ့်လည်း လောကီဥစ္စာ-ရွှေမို့သာ အခိုးခံရမှာ ကြောက်ရတာပါကွ၊ ငါတို့ဗုဒ္ဓဘာသာရဲ့အကျင့်တွေကို ခိုးရုံမကလို့ ပေါ်ပေါ်တင်တင် ယူရင်တောင် ဝမ်းသာရဦးမှာ၊
တစ်ခုတော့ရှိတာပေါ့၊ အခုငါတို့ အွန်လိုင်းပေါ်မှာ သူများစာတွေ ကဗျာတွေ ဓာတ်ပုံတွေ ယူသုံးရင် ပိုင်ရှင်ဘယ်သူပါဆိုပြီး ညွှန်းပေးရသေးတာ၊ ဗုဒ္ဓလမ်းစဉ်ကို ယူသုံးတယ်ဆိုရင်လည်း ဒါဟာ ဗုဒ္ဓလမ်းစဉ်ပါ ဆိုတာမျိုးတော့ ရိုးရိုးသားသား ရည်ညွှန်းသင့်တာပေါ့---၊
ဗုဒ္ဓဘာသာဝင်တွေက အဲ့ဒီလိုသူများဘာသာက ကျင့်စဉ်တွေ ယူသုံးမိရင်လည်း ဒါ ဘယ်သူ့ကျင့်စဉ်ပါ-ဘယ်သူ့လမ်းစဉ်ပါ ဆိုပြီး ရည်ညွှန်းချက်ပေးရမှာပဲ"
" ဒါတော့ ဟုတ်တာပေါ့ဘုရား၊ ဒါပေမယ့် ဗုဒ္ဓဘာသာဝင်တွေက အဲ့ဒီလို ယူသုံးတာ ရှိလို့လား အရှင်ဘုရား "
" အာ---မင်းကလည်း ဝေးပါ့ကွာ၊ ဥပမာ ပေးတာပါဆို "
" သြော် ---- အဟီး---တင်ပါ့ တင်ပါ့---ဆက်ပါဦးဘုရာ့ "
" ဟို---ဒီက ကောင်းတဲ့အကျင့်ယူပြီး မကောင်းတဲ့နေရာမှာ အသုံးချတာမျိုး၊ သက်သက်မဲ့ ဖျက်လိုဖျက်ဆီးလုပ်တာမျိုး ဆိုရင်တော့ သတိထား ကာကွယ်ရမှာပေါ့လေ၊
အင်း---ငါတို့ဗုဒ္ဓဘာသာတွေကလည်း သူများဘာသာတွေရဲ့ ကောင်းမြတ်တဲ့လမ်းစဉ် တွေကို မထီမဲ့မြင် မလုပ်အပ်ဘူး "
" တင်ပါ့---ဟုတ်ပါတယ်ဘုရာ့ "
" အင်း---နောက်ဆုံးပြောချင်တာကတော့ ကိုယ့်မှာ ရွှေရှိတယ်ဆိုပြီး ရွှေမရှိတဲ့ လူတွေရှေ့မှာ ပြစားပြစား မြှောက်ကားကားနဲ့ တစ်ဖက်သားကို နှိမ်သလိုတော့ မလုပ်မိစေနဲ့ပေါ့လေ၊ ကိုယ့်ပစ္စည်းနဲ့ကိုယ် လူမုန်းခံရတာ မတန်ဘူးကွ "
" တင်ပါ့ တင်ပါ့---သဘောပေါက်ပါတယ်ဘုရာ့၊ ခွင့်ပြုပါဦး "
" ကောင်းပါပြီဗျာ "
------------------------***-----------------------
အရှင်ကောသလ္လ(ရေဦး)
၁၅၊ ၆၊ ၂၀၁၆။
No comments:
Post a Comment