ကဿပဘုရားရှင် လက်ထက်တော်အခါက သုမင်္ဂလ အမည်ရှိသော သူဌေးတစ်ဦးသည်ကြီးကျယ်ခမ်းနားသော ရွှေကျောင်းကြီးတစ်ဆောင်ကို ဆောက်လုပ်လှူဒါန်းထား၏။ မကြာခဏဘုရားကျောင်းတော်သို့ သွားလေ့ရှိ၏။ တစ်နေ့သ၌ ကျောင်းမှအပြန် မြို့တံခါးအနီးရှိ ဇရပ်တစ်ဆောင်ပေါ်တွင် သင်္ကန်းကို ခေါင်းမြီးခြုံ၍ အိပ်နေသော သူခိုးတစ်ယောက်ကို တွေ့မြင်၏။“ ခြေထောက်တွင် ရွှံ့နွံအလိမ်းလိမ်းကပ်လျက် သင်္ကန်းကို ခေါင်းမြီးခြုံပြီး ဤဇရပ်ပေါ်၌မတော်မလျော် အိပ်စက်နေသူမှာ ရဟန်းအယောင်ဆောင်ထားသော သူခိုးသာ ဖြစ်ရမည်။ ဘယ်နည်းနှင့်မျှ ရဟန်းကောင်း မဖြစ်နိုင် ” ဟု မှတ်ချက် ချ၍ ပြောဆို၏။အယောင်ဆောင် သူခိုးသည် သူ့အား ဤသို့ပြောရမည်လားဟု အမျက်ဒေါသ ပြင်းစွာထွက်လျက် သူဌေးကို ရန်ငြိုးဖွဲ့၏။ သူဌေးပိုင်သော လယ်ယာများကို ခုနှစ်ကြိမ်တိတိ မီးတိုက်ဖျက်ဆီး၏။ သူဌေးပိုင်သော နွားခြံသို့ဝင်၍ ခုနှစ်ကြိမ်တိုင်တိုင် နွားများ၏ ခြေထောက်ကို ဓားဖြင့်ခုတ်ဖြတ်၏။ သူဌေး၏ နေအိမ်ကို ခုနှစ်ကြိမ်တိတိ မီးကွင်းပစ်၍ မီးရှို့၏။ခိုးသူသည် ဤမျှလောက် ဖျက်ဆီးရသည်ကို မကျေနပ်သေးမူ၍ သူဌေးဆောက်လုပ်လှူဒါန်းထားသော နံ့သာရွှေကျောင်းတော်ကြီးကို ကဿပဘုရားရှင် ဆွမ်းခံကြွနေသည့်အခိုက် မီးတိုက်ဖျက်ဆီးပြန်လေ၏။ သုမင်္ဂလ သူဌေးသည် မီးလောင်ရာသို့ ပြေးလာပြီးလျှင် စိတ်မချမ်းသာခြင်း၊ ဒေါသထွက်ခြင်း အလျင်းမရှိမူ၍ တစ်ကြိမ်မီးလောင်သော် နှစ်ကြိမ်လှူမည်ဟု လက်ရုံးဆန့်၍ ပြောကြား၏။ မကြာမီ နောက်ထပ် ကျောင်းသစ်ကြီးတစ်ဆောင် ဆောက်လုပ်ပြီးလျှင် သံဃာနှစ်သောင်း ခြံရံလျက် မြတ်စွာဘုရားအား လှူဒါန်းပြန်၏။ဗျာပါဒအားကြီးသော ခိုးသူသည် “ ဤသူဌေးကို အရှင်ထား၍ အရှက်တကွဲ အကျိုးနည်းအောင် လုပ်လေခြင်းထက် အသေသတ်ပစ်မှ နားအေးမည် ” ဟု ပြင်းထန်သော အစွဲဖြင့် ဓားမြှောင်ကို ခါးထိုး၍ အမြဲတစေ ချောင်းမြောင်းနေ၏။ သို့သော် အခွင့်မသာ၍ မသတ်နိုင်။သူဌေးကြီးသည် မြတ်စွားဘုရားနှင့် ရဟန်းသံဃာတို့ကို ပင့်၍ ကျောင်းရေစက်ချပွဲကို ပြုလုပ်သောအခါ “ တပည့်တော်၏ အကျိုးတရား ပျက်ပြားအောင် ဖျက်ဆီးပြီး အသက်ကိုပင် ရန်ရှာနေသောသူသည် ဤပရိသတ်အတွင်း၌ ရှိနေပါသည်။ ထိုသူအား တပည့်တော် အမျက်ဒေါသမထားသည့်အပြင် ယခုပြုသော ကုသိုလ်အဖို့ကို ထိုသူအား ရှေးဦးစွာ ပေးပါ၏ ” ဟု လျောက်ထားပါသည်။ထိုစကားကို ကြားသောအခါ သတ်ဖြတ်ရန် ချောင်းမြောင်းနေသော ခိုးသူသည် မိမိ၏ အမှားကို သိ၍ သူဌေးကြီးအား သည်းခံရန် တောင်းပန်၏။ သူဌေးကြီးက သည်းခံသော်လည်း သူ၏ဗျာပါဒစေတနာကြောင့် သေသောအခါ အ၀ီစိငရဲ၌ နှစ်ပေါင်းများစွာ ခံရလေ၏။ ငရဲမှ လွတ်သောအခါ ရာဇဂြိုဟ်မြို့အနီး ဂိဇ္ဈကူဋတောင်ဝယ် တစ်ကိုယ်လုံး မီးလောင်၍ ဝေဒနာပြင်းပြစွာ ခံစားရသော စပါးကြီး မြွေပြိတ္တာကြီး ဖြစ်ရပြန်လေသည်။(ဓမ္မပဒအဌကထာ၊ ဒုတိယအုပ်၊ ဒဏ္ဍ၀ဂ်၊ အဇရပေတ၀တ္ထု){နှစ်ဖက်လှ ဦးကျော်လွင်၏ ဗုဒ္ဓဘာသာ လူထက်လူ မှ ကောက်နုတ်ရေးသားပူဇော်ပါသည်။ }(မှားယွင်းမှုများရှိသော် အစဉ်သနားသောအားဖြင့် သည်းခံခွင့်လွှတ်ပေးပါရန်ဦးခိုက်လျှောက်ထားပါသည် ဆရာတော်အရှင်သူမြတ်ဘုရား)ဦးသိန်းဝေ။
No comments:
Post a Comment