သီတဂူဆရာတော်နှုတ်ခွန်းဆက်

"သီတဂူဆရာတော်နှုတ်ခွန်းဆက်"
(မြန်မာ့နှစ်သစ်ကူး ၁၃၇၈ခုနှစ်)

ကျေးဇူးတော်ရှင် သီတဂူဆရာတော်ကြီးထံမှ မြန်မာ့နှစ်ကူးနှစ်သစ်ဦး မင်္ဂလာအချိန်အခါသမယတွင် မြန်မာပြည်သူပြည်သားများ၊ ကမ္ဘာသူကမ္ဘာသားများထံသို့ နှုတ်ခွန်းဆက်လွှာ ဖြစ်ပါသည်။

#နှစ်သစ်ကူးနှုတ်ခွန်းဆက်လွှာ

တရားချစ်ခင်သူတော်စင်အပေါင်းတို့...... 

ယခုတစ်နှစ်ဟောင်း၍ တစ်နှစ်ပြောင်းခဲ့ပြန်ပါပြီ။ နှစ်တွေ၊ နှစ်တွေ ဟောင်း၍ဟောင်း၍ ပြောင်းသွားသလိုပဲ “ရုပ်”၊ “နာမ်” ခန္ဓာတွေလည်းပဲ ဟောင်းတာတွေ ပြောင်းပြောင်းပြီးတော့ ဟောင်းတာတွေပျက်ပျက်ပြီးတော့  အသစ်အသစ်တွေ ဖြစ်၍ဖြစ်၍ နေကြပါတယ်။ ဟောင်း၍ဟောင်း၍ ထားပစ်ခဲ့ရတဲ့နှစ်တွေမှာ ငါ့အတွက်၊ မိမိအတွက် သူတစ်ပါး လူသားတို့အတွက် ငါ့ရဲ့လုပ်ဆောင်ချက်ကြောင့် အကျိုးအမြတ်ဘယ်လောက်ဖြစ်ထွန်း ကျန်ရစ်ခဲ့သလဲဆိုတာစီစစ်စဉ်းစားသင့်ပါတယ်။ မြတ်ဗုဒ္ဓက ဇာတ်တော်များမှာ ဟောထားတာတစ်ခုရှိပါတယ်။

“အချိန်သည်အချိန်ကိုစားသောကြောင့်အချိန်တွေကုန်တယ်။ အချိန်ကလူကိုစားသောကြောင့်လူတွေလည်းကုန်နေတယ်။ အချိန်ကို နိုင်အောင် မစားနိုင်လျှင်ဘ၀မှာအရှုံးထွက်မယ်။ ဘ၀အတွက်အမြတ်ထွက်အောင်အချိန်ကိုနိုင်အောင်စားရမယ်” လို့ ဟောပါတယ်။ 

ဒါကြောင့်မိမိတို့ဘ၀တစ်သက်တာမှာ မိမိတို့လုပ်ထားသမျှအလုပ်တို့ရဲ့ အကျိုးအမြတ်များနှင့် ဆုံးရှုံးနစ်နာမှုများကို ပြန်လည်သုံးသတ် ကြပါလို့ ရှေးဦးစွာ တိုက်တွန်းလိုပါတယ်။ မြတ်ဗုဒ္ဓ၏ အဘိဓမ္မာမှာ ဤလောကတစ်ခုလုံး၌“ရုပ်”၊ “နာမ်”- နှစ်ပါးရှိသည်ဟု ဟောတော်မူ ထားပါတယ်။ ထို“ရုပ်”၊ “နာမ်”နှစ်ပါးတို့တွင် “နာမ်”တရားက  “ရုပ်”တရားကိုဦးဆောင်သည်ဟု ဟောတော်မူပါတယ်။ “နာမ်”ဆိုတဲ့(စိတ်)သာ “ရုပ်” လောကကိုဦးဆောင်နေပါတယ်။ လူတို့၏စိတ်သည် လောကကြီးတစ်ခုလုံး၏ ရှေ့သွားခေါင်းဆောင်ဖြစ်ပါတယ်။ လူ့စိတ်သည်အရာရာကို ဦးဆောင်ပါတယ်။ ကောင်းမြတ်သောစိတ်သည် သာယာလှပသောကမ္ဘာကိုဖန်တီးတတ်ပါတယ်။ ယုတ်ညံ့သောစိတ်သည် အယုတ်ဆိုးသောကမ္ဘာကို ဖန်ဆင်းတတ်ပါတယ်။ ဒါကတော့ (Natural Law)လို့ခေါ်တဲ့ သဘာဝဥပဒေ - ပါဠိလိုပြောမယ်ဆိုရင်တော့ နိယာမသဘောပဲဖြစ်ပါတယ်။ လောဘ၊ ဒေါသ၊ မောဟ၊ အတ္တတို့နှင့်တွဲဖက်နေသောစိတ်သည် အစွန်းရောက်၍အရုပ်ဆိုးသောစိတ်ဖြစ်ပါတယ်။ လောဘအစွန်းရောက်လျှင် လုယက်သိမ်းပိုက်ခြင်းတွေအလွန်များကာ ကမ္ဘာကြီးအရုပ်ဆိုးနေပေလိမ့်မယ်။ ဒေါသ၊ မာနအစွန်းရောက်လျှင် တိုက်ခိုက် သတ်ဖြတ် နှိပ်စက်ခြင်းဖြင့် ကမ္ဘာကြီးအရုပ်ဆိုးနေပါလိမ့်မယ်။ မောဟစွန်း၊ အတ္တစွန်းရောက်ရင်တော့ ပဋိပက္ခတွေ၊ တိုက်ခိုက်ခြင်းတွေနှင့် ကမ္ဘာကြီး အရုပ်ဆိုးနေပါလိမ့်မယ်။ 

အထက်ဖေါ်ပြပါအစွန်းရောက်စိတ်တွေကြောင့် ယနေ့ကမ္ဘာကြီးဟာ  အလွန်အရုပ်ဆိုးနေပါပြီ။ ထို့ကြောင့် ဒီနေ့ ဒီနှစ်သစ်ကူးပွဲတော်ကြီးမှာ ရေသဘင်ပွဲဆင်နွှဲပြီးတော့ ပျော်ကြမည့် နိုင်ငံသူ၊ နိုင်ငံသားအားလုံး အစွန်းရောက်စိတ်တွေကိုအလယ်လမ်းသို့ပြန်ရောက်အောင် သင်္ကြန်မှာ ၀ိုင်းဝန်း၍ တောင်းဆိုပေးကြပါလို့တိုက်တွန်းလိုပါတယ်။ 

လူသည်ပန်းချီဆရာနှင့်တူတယ်လို့ ဗုဒ္ဓကဟောတော်မူပါတယ်။ လူ့စိတ်သည် ပန်းချီဆရာနဲ့တူတယ်လို့ မြတ်ဗုဒ္ဓဟောပါတယ်။ ဒါဆိုလျှင် ဒီနေ့ကမ္ဘာ့နိုင်ငံခေါင်းဆောင်တွေအားလုံးဟာ ကမ္ဘာကြီးရဲ့ ပန်းချီဆရာတွေပဲပေါ့။ ပန်းချီဆရာသည် ကြောက်မက်ဖွယ်ကောင်းသောဘီလူး၊ သူရဲ၊ လူဆိုး၊ သူခိုး၊ တိုက်ခိုက်သတ်ဖြတ်ခြင်းဆိုတဲ့ ကားချပ်များကိုဆွဲတတ်သလိုပဲ (ရေးဆွဲတတ်သလိုပဲ) ချစ်ခင်ပျော်ရွှင်ဖွယ်ကောင်းတဲ့ နတ်သမီး၊ နတ်သား၊ နတ်ဥယျာဉ်၊ နတ်ဗိမာန်၊ ပန်းဥယျာဉ် ပန်းချီကားများကိုလည်း ရေးဆွဲတတ်ပါတယ်။ ယနေ့ကမ္ဘာမှာနိုင်ငံတော်တော်များများ အလှပျက်၊ အရုပ်ဆိုးနေကြပါတယ်။ 

ဒါ့ကြောင့်နိုင်ငံရေးခေါင်းဆောင်များ၊ ဘာသာရေးခေါင်းဆောင်များ၊ လူမှုရေးခေါင်းဆောင်များ၊ ပညာရေးခေါင်းဆောင်များ၊ စိတ်ဓာတ်ရေး ခေါင်းဆောင်များအားလုံးကိုတိုက်တွန်းလိုပါတယ်။ ပန်းချီဆရာသည်ကြည်လင်သောစိတ်ကိုမွေး၍ လှပကြည်နူးဖွယ်ကောင်းသော ပန်းချီကားချပ် များကို ရေးဆွဲသကဲ့သို့ သင်တို့၊ ငါတို့၊ နိုင်ငံရေး၊ ဘာသာရေး၊ လူမှုရေး၊ ပညာရေး ပန်းချီဆရာများအားလုံးတို့လည်း မေတ္တာ၊ ကရုဏာ၊ မုဒိတာ၊ သဒ္ဓါ၊ ပညာဟူသောလှပတဲ့ စိတ်ဓာတ်များကိုမွေး၍ သင်တို့နေရာ၊ ငါတို့နေရာ ဤကမ္ဘာကို လှပပျော်ရွှင်ဖွယ်ကောင်းတဲ့ ကမ္ဘာသစ်ကြီးတစ်ခုဖြစ်လာအောင် (လှပသောပန်းချီကားတစ်ချပ်ကို ရေးဆွဲသကဲ့သို့) ၀ိုင်းဝန်း ရေးဆွဲပေးကြပါဟု တောင်းပန်တိုက်တွန်းရင်း နှစ်သစ်မှာ နှုတ်ခွန်းဆက်ပါတယ်။

“နိုင်ငံသားတိုင်းသည်နိုင်ငံတိုင်းကို လှပအောင်ဖန်တီးနိုင်ကြပါစေ” “သီတဂူစန်းလပမာချမ်းမြသာယာရှိကြပါစေ”
“နှစ်သစ်မှာ လှပသောပန်းချီကားချပ်များကို ရေးဆွဲနိုင်ကြပါစေ”

==============================
သီတဂူစန်းလပမာ ချမ်းမြသာယာ ရှိကြပါစေ။
သီတဂူသာသနာပြုအဖွဲ့
==============================
Posted by သီတဂူသတင်း
ဗီဒီယို - သီတဂူအောင်သန်းဝင်း