အမေနှင့်ပတ်သက်သော မသိကိန်းများကို
------------------------
အဖြေရှာဖွေကြည့်သည့်အခါ
----------------
သားသမီးတွေကို ထမ်း၊
ဘယ်လမ်းအထိ လှမ်းလျှောက်နေရဦးမလဲ
အမေဟာ ရပ်တန့်မှာလား ပြောင်းလဲမှာလား
ဒါတွေက ရှူရှိုက်မိတဲ့ မသိကိန်းတွေပဲဆိုပါစို့။
ရပ်တန့်မှာလား မရပ်တန့်ခဲ့
အမေဟာ သောက ပရိဒေ၀ ဒုက္ခတွေကို
ကျော်လွှားလျှောက်သွားပေါ့....
ရပ်တန့်မှာလား ရပ်တန့်နေရဲ့
အခက်အခဲတွေကို မရှောင်ပြေး
သားသမီးရှေ့မှာမားမားမတ်မတ်ရပ်လို့..
ဒါတွေက မသိကိန်းရဲ့ အဖြေ။
ပြောင်းလဲမှာလား မပြောင်းလဲခဲ့
အမေဟာ မေတ္တာတွေ သစ္စာတွေ ဖြူစင်လျက်
ကာလာ မပြောင်းခဲ့......
ပြောင်းလဲမှာလား ပြောင်းလဲခဲ့ရဲ့
နားကပ်တစ်ရံလည်း အမေ့နားဗိမာန်မှာ
မပျော်လို့ထင်တယ်
ဗိမာန်အသစ်ပြောင်းဆောက်ခဲ့
အမေ့နားပေါက် ဟောင်းလောင်း....
အမေ့ဈေးခြင်းတောင်းလေးအရေခွံပြောင်းလဲခဲ့
ဈေးခြင်းတောင်းအသစ်လေး အမေရွက်...
ခေါင်းခုလေးတွေ အမေ့ခေါင်းမှာ တစ်ထည်ပြီးတစ်ထည်ဝပ်ကျင်းပြောင်းကြလေရဲ့
ဒါတွေက မသိကိန်းရဲ့ အဖြေ။
မသိကိန်းတွေရဲ့ အဖြေရလာတော့လည်း
ပြက္ခဒိန်စာရွက်တွေ တစ်ရွက်ပြီးတစ်ရွက်သေဆုံး
နေလုံးတွေတစ်လုံးပြီးတစ်လုံးကွယ်ပျောက်
အသက်တွေ ထောက်လာတော့
အမေ့ကို ဥပါဒ် ဌီ ဘင်ထဲ
ခပ်ဖြေးဖြေးပဲ လှော်ခတ်စေချင်မိ။
မသိကိန်းတွေရဲ့ အဖြေရလာတော့လည်း
အမေ့ဒဏ်ရာအတွက်
ဖြေဆေးအစစ်မဟုတ်မှန်းသိနေတော့
အားငယ်ခြင်းတွေ လွယ်ပိုး
သက်ပြင်းတွေခိုးရှိုက်ရတာပဲ
အဖတ်တင်တယ်
သားအိပ်မက်တွေ အတောင်မပေါက်သေးလို့
``အမေ ကျန်းမာပါစေ၊´´
ဒါပဲ ရွတ်နိုင်သေးတဲ့သားအတွက်
အမေ ခွင့်လွှတ်ပါဦး....
တစ်နေ့......
အမေ့တွက် ဖြေဆေးအစစ်
သား ရှာတွေ့မှာပါ...တွေ့မှာပါအမေ...။
၂၄/၄/၂၀၁၆
ဝန်းရံခ(သလ္လာဝတီ)
No comments:
Post a Comment