(၁)
ကန်တော့ပန်းဆင် စာပလ္လင်
==================
ဒီအရှင်ရေးသားလိုက်တဲ့ သတိပဋ္ဌာန်စာစုများဟာ လောကလူသားတို့အတွက် ဘယ်အတိုင်းအတာအထိ အကျိုးရှိမယ်မသိ။ ဒီအရှင်ကတော့ဖြင့် ဒီစာစုများကို ကိုယ်သိသလောက် အများလည်း သိခွင့်ရဖို့ အများနားလည်နိုင်အောင် ရေးသားလိုက်နိုင်လို့ အရှင့်ဘာသာ အလွန်အားရ ကျေနပ်နေမိတာ အမှန်ပါ။
အထူးသဖြင့် ဒီစာစုများနဲ့ ပတ်သက်ပြီး မဖြစ်မနေ ကျေးဇူးစကားဆိုရန် ရှိနေပါသေးတယ်။ မှီရာပုဂ္ဂိုလ်မြတ်တို့ရဲ့ ကျေးဇူးတရားများအကြောင်းပါ။
သတိပဋ္ဌာန်ဆိုတာ ဘာမှန်းမသိပေမဲ့ ဉာဏ်ကောင်းစေတယ်၊ အမှန်တရားကို မြတ်နိုးစေတတ်တယ် စတဲ့ အကြောင်းပြချက်တွေနဲ့ သတိပဋ္ဌာန်တရား အားထုတ်ဖို့ အတင်းရော၊ အဓမ္မရော စေခိုင်းတော်မူခဲ့ကြတဲ့ ဆရာသမားများကို တစိမ့်စိမ့်တွေးပြီး ကျေးဇူးတင်နေမိပါတယ်။ ဆရာတွေကသာ ဒီသို့ဒီပုံ မစေခိုင်းမိခဲ့ကြပါက ဒီအရှင်ဟာ ဒီအချိန်ဆိုရင် ဘာတွေဖြစ်နေမယ်၊ ဘယ်ဘ၀ ရောက်နေမယ်မှန်းတောင် မခန့်မှန်းနိုင်ပါ။
ညီအစ်ကို လေးယောက်ရှိတာ အသက် ၃၆ နှစ်ကတည်းက အသက်ရှင်ကျန်သူဆိုလို့ ဒီအရှင်တစ်ပါးထဲ၊ လေးတန်းအတူအောင်ခဲ့ကြတဲ့ ယောက်ျားလေး ၁၄ ယောက်ထဲမှာ ဒီအရှင်အပါအ၀င်မှ လက်ငါးချောင်းတောင် မပြည့်တော့တာတွေကို သတိထားမိတိုင်း သတိပဋ္ဌာန်တရားကို ကျေးဇူးတင်နေမိပါတယ်။
ဟုတ်ပါတယ် ဒီအရှင်ရဲ့ လက်ရှိပိုင်ဆိုင်မှု အားလုံးထဲမှ တစ်ဝက်ကျော်ကျော်လောက်ဟာ သတိပဋ္ဌာန်တရားတော်ရဲ့ ကျေးဇူးကြောင့်လို့ ဆိုနိုင်ပါတယ်။ ဗီဇညံ့၊ ပတ်ဝန်းကျင်ဖျင်း၊ ရှေးကုသိုလ်နည်းခဲ့တဲ့ အရှင့်အဖို့မှာ လက်ရှိပိုင်ဆိုင်ထားမှုများဟာ အိပ်မက်ဆန်လွန်းလှပါတယ်။ ရသင့်ရှိသင့်တာထက် ဆယ်ဆမက သာလွန်ပြီး ပိုင်ဆိုင်ထားတယ် ဆိုပါစို့ရဲ့။
ဒီအရှင်ဟာ ပုံမှန်အားဖြင့် တကယ်တမ်းမှာ ရှိနေဖြစ်နေသင့်တာက ငမျောက်ငချောက်အဆင့် အနုညာတကျောမွဲပါ။ ဒါမှမဟုတ် ဘ၀ယုတ်တစ်ခုခုမှာ ရင်ဆိုင်ဖြတ်သန်းနေရအံ့ထင်ရဲ့။ အခုမှာတော့ အဲ့ဒီထက် နည်းနည်းလေး သာခွင့်ရခဲ့တယ်။ ဒါကိုက အရှင့်အတွက် တန်ဖိုးမဖြတ်နိုင်တဲ့ သတိပဋ္ဌာန်တရားတော်ရဲ့ ကျေးဇူးတွေလို့ ဆိုချင်ပါတယ်။
သို့ကလို အကြောင်းချင်းရာတွေကြောင့် အရှင်ဟာ ဒီစာစုများနဲ့ သတိပဋ္ဌာန်တရားတော်ကို ကန်တော့ပန်းဆင်လိုက်ရတာကို အားရကျေနပ်မိရခြင်းပါ။ ဒါ့အပြင် အရှင့်ကို ပရိယတ္တိစာပေများနဲ့ သတိပဋ္ဌာန်တရားကို ပတ်သက်စေခဲ့တဲ့ ဆရာသမားများကိုလည်း ဒီစာစုများဖြင့် ကန်တော့ပန်းဆင်ပါတယ်ဘုရား။ ဒါ့အပြင် စာပလ္လင်မှာ ကမ္ဗည်းတင်ခွင့်ပြုတော်မူကြပါကုန်ဘုရား။
၁။ လွန်တော်မူပြီးဖြစ်တဲ့ အရှင့်ရဲ့ ငယ်ဆရာ ပူတာအိုမြို့၊ ပန်းလှိုင်ကျောင်းဆရာတော် ဘဒ္ဒန္တအရိယ၀ံသ၊
၂။ ငယ်ဆရာအထံကနေ လက်လွဲယူပြီး မြို့ပြယဉ်ကျေးမှု အပါအ၀င် ပရိယတ် ပဋိပတ်များကို ဆည်းပူးခွင့်ပေးတော်မူခဲ့တဲ့ ကော့မှူးမြို့၊ ငြိမ်းအေးချမ်းသာဆရာတော် ဘဒ္ဒန္တခေမာနန္ဒ၊
၃။ အရှင့်ကို တပည့်ဆိုတာထက် သားလိုချစ်ခဲ့၊ လွန်တော်မူပြီးဖြစ်တဲ့ သာမဏေဥပဇ္ဈာယ်ဆရာ ရန်ကင်းမြို့နယ်၊ မိုဃ်းကောင်းကျောင်းဆရာတော် ဘဒ္ဒန္တသေဋ္ဌိလနဲ့ စာချဆရာများ၊
၎။ လွန်တော်မူကြပြီးဖြစ်တဲ့ ခရမ်းမြို့၊ ဒုတိယကိုင်းကုန်းဆရာတော် ဘဒ္ဒန္တတေဇ၊ တတိယကိုင်းကုန်းဆရာတော် ဘဒ္ဒန္တကေလာသနဲ့ လွန်ပြီးရှင်ဆဲ စာချဆရာတော်များ၊
၅။ လွန်တော်မူပြီးဖြစ်တဲ့ မန္တလေးမြို့၊ မစိုးရိမ်တိုက်သစ်ဆရာတော် ဘဒ္ဒန္တသိရိန္ဒာဘိဝံသနဲ့ ဓမ္မသမိဒ္ဓိကျောင်းနာယကဆရာတော်အပါ စာချဆရာများ၊
၆။ မန္တလေး သာသနာ့တက္ကသိုလ်က ဘာဘွဲ့မှ မရခဲ့ပေမဲ့ တစ်စုံတစ်ရာ သင်ပေးခဲ့ကြတဲ့ ဆရာသမားများ၊
၇။ ၁၃ နှစ်သား သာမဏေဘ၀က မဟာစည် ကမ္မဋ္ဌာနာစရိယများ ဖြစ်တော်မူခဲ့ကြတဲ့ ထားဝယ်ဆရာတော် ဘဒ္ဒန္တသာသန၊ နောင်အခါ ရဟန်းဘ၀ သြဝါဒဆရာပါဖြစ်တော်မူတဲ့ မြစ်သားဆရာတော် ဘဒ္ဒန္တဝါသ၀၊ နောင်အခါ ရဟန်းဥပဇ္ဈာယ်ဆရာဖြစ်တော်မူပြီး ယခုခါ လွန်တော်မူပြီးဖြစ်တဲ့ ရွှေရေးဆောင်ဆရာတော် ဘဒ္ဒန္တပညာသာမိ၊
၈။ ၈၈ အရေးအခင်းမှာ ပြေးရင်းလွှားရင်း တရားရိပ်မှာ ခိုလှုံခွင့်ပေးတော်မူခဲ့တဲ့ လှိုင်မဟာစည်ဆရာတော် ဘဒ္ဒန္တစန္ဒာဝရနဲ့ ကမ္မဋ္ဌာနာစရိယ ဘဒ္ဒန္တပညာသာမိ၊
၉။ ၁၃၇၈ ခုနှစ်၊ ဝါတွင်းကာလတွင် အရှင်ရဲ့ မဟာစည် ကမ္မဋ္ဌာနာစရိယဖြစ်တော်မူခဲ့တဲ့ ငါးသိုင်းချောင်းဆရာတော် ဘဒ္ဒန္တဣန္ဒာသက္ကနဲ့ ဆရာသမားများ၊
၁၀။ တစ်ပါဒ တစ်ဂါထာမှစပြီး အရှင့်ရဲ့ တတ်သိလိမ္မာရေးအတွက် နည်းပေးလမ်းပြ ဆိုဆုံးမတော်မူခဲ့ကြတဲ့ ဆရာသမားများ၊
အရှင့်ဘ၀မှာ ကျေးဇူးရှင် ဆရာသမားများအပြင် မှတ်တမ်းတင်ထိုက်တဲ့ ကျေးဇူးရှင်များကိုလည်း စာပလ္လင်မှာ ကမ္ဗည်းတင်လိုပါသေးတယ်။
၁။ ပူတာအိုမြို့၊ ပန်းလှိုင်ရပ်ကွက်မှ မိဘနှစ်ပါး (ဦးစ၀်နွဲ့ထမ္မလစ်) + ဒေါ်စွဲ့ဖုန်းမ (သီလရှင် ဒေါ် စန္ဒာထေရီ အဖြစ်ဖြင့် လွန်ပါသည်။)
၂။ စမ်းချောင်းမြို့နယ်၊ ကျွန်းတောလမ်းမှ ရှင်ဒါယိကာမကြီး (ဒေါ်အမာတင်)၊
၃။ ရဟန်းဒကာ/မများဖြစ်ကြတဲ့
(က) သြစတေးလျနိုင်ငံ၊ ရော့ဟန်တန် မြို့နေ ပါမောက္ခဒေါက်တာ ဘညွန့် + ဒေါ်သန်းသန်းဝေ မိသားစု၊
(ခ) ဗဟန်း မြို့နယ်၊ ဓမ္မစေတီလမ်းနေ (ဦးညွန့်တင်) + (ဒေါ်အိအိဝင်း) မိသားစု၊
၎။ ကံထပ်ဒကာ/မများဖြစ်ကြတဲ့
(က) မိုးကောင်းမြို့နယ်၊ ညောင်ကုန်းကျေးရွာနေ (ဒေါ်စွဲ့အောင်ဆ)၊ သမီး စွဲ့ပဉ္စမိသားစု၊
(ခ) မိုးကောင်းမြို့၊ ဈေးကုန်းရပ်နေ (ဒေါ်စွဲ့ဆိန္နာလစ်)၊ သား (ဦးစ၀်နွဲ့ထွန်း) + (ဒေါ်စွဲ့အောင်ဆ) မိသားစု၊
(ဂ) မိုးကောင်းမြို့နယ်၊ ညောင်ကုန်းကျေးရွာမှ အရှင့်ရဲ့ ဆွေမျိုး ညီအစ်ကို မောင်နှမများ၊
(ဃ) မိုးကောင်းမြို့၊ အောင်သုခရပ်နေ ဒေါ်ခင်လှ မိသားစု၊
(င) အရှင့်ကို ရှင်သာမဏေဘ၀မှ ယနေ့ကျအောင် ပစ္စည်းလေးပါးဖြင့် ထောက်ပံ့လှူဒါန်းခဲ့ကြတဲ့ များစွာသော ကျွေးမိဘများ၊
ဆိုခဲ့တာတွေအပြင် အမှတ်မထင် ပြုမူမိခဲ့ကြတဲ့ အခြားအခြားသော ကျေးဇူးရှင်တို့အားလည်း ကျေးဇူးစကားဆိုရင်း ဒီစာပလ္လင်မှာ မှတ်တမ်းတင် ဂုဏ်ပြုအပ်ပါတယ်။ ဒါ့အပြင် အမည်နာမဖော်ပြပြီး ကျေးဇူးမှတ်တမ်းပြုချင်ပေမဲ့ စာပလ္လင်အလွန်ရှည်သွားမှာစိုးလို့ မှတ်မှတ်ထင်ထင် ရှိခဲ့ပါလျက် ချန်ရစ်ခဲ့ရတဲ့ ကျေးဇူးရှင်တို့အားလည်း နားလည်ခွင့်လွတ်ပေးကြပါမည့်အကြောင်း တောင်းပန်စကား ဆိုအပ်ပါတယ်။
အချုပ်အားဖြင့် ကျေးဇူးတင်ထိုက်သူများ အားလုံး အားလုံးကို ကျေးဇူးတင်ပါတယ်။
(ငြိမ်းနန္ဒ)
အရှင်ကုသလာနန္ဒ
ဒေ၀ကျောင်းတိုက်
ဈေးကုန်းရပ်ကွက်
မိုးကောင်းမြို့
ဖုန်း ၀၉၄၂၆၄၀၀၄၂၄
၀၉၇၇၇၀၅၀၈၀၂
(၁၁ /၁၀ /၂၀၁၇)
No comments:
Post a Comment